Фото: Жетісу облыстық ПД
Қызылорда қаласындағы мектептердің бірінде оқушыны жасөспірімдер жабылып ұрған. Мектеп әжетханасының ішінде болған оқиға бейнекамераға түсіп қалды. Желіде тараған видео көпшілік арасында қызу талқыланды.
Ондағы ақпаратқа сенсек, оқушыны ұрып-соғу дерегі 8 қазан күні таңертеңгі уақытта тіркелген. Денсаулығына зақым келген жәбірленуші жергілікті ауруханаға жеткізіліп, оған ота жасалған.
Kazinform тілшісінің ресми сауалына байланысты облыстық полиция департаменті түсініктеме берді.
– Бұзақылық дерегі бойынша қылмыстық іс қозғалды. Қазіргі уақытта оқиғаның барлық мән-жайын анықтауға бағытталған қажетті шаралар жүргізіліп жатыр. Күдікті ретінде кәмелетке толмағандар ұсталып, полицияға жеткізілді. Сондай-ақ кінәлі жасөспірімдердің заңды өкілдері бала тәрбиелеу жөніндегі міндеттерді тиісті деңгейде орындамағаны үшін жауапқа тартылатынын еске салғым келеді, — деді департамент бастығының бірінші орынбасары Серік Тоқтыбаев.
Ведомство өкілі қылмыстық істі тергеу барысы департамент басшылығының ерекше бақылауында екенін атап өтті.
Қосымша шара қабылдау және осындай мінез-құлыққа ықпал ететін себептерді жою үшін полиция әкімдік жанындағы кәмелетке толмағандар ісі жөніндегі комиссияға ұсыныс жолдаған.
