Бүгін Қызылорда облысына Жамбыл облысынан делегация іссапармен келіп, өңіраралық байланыстарды тереңдету және өзара тәжірибе алмасу мәселелері қарастырылды. Меймандарды облыс әкімінің бірінші орынбасары Данияр Жаналинов қарсы алды деп хабарлайды Қызылорда облысы әкімінің баспасөз қызметі.
Кездесу барысында тараптар әлеуметтік және экономикалық бағыттар бойынша ұсыныстарымен бөлісіп, бірлескен жобаларды жүзеге асыру әлеуетін талқылады.
Алдымен делегация балаларға және жасөспірімдерге арналған «Сыр жұлдыздары» шығармашылық-инновациялық академиясының жұмысымен танысты. Орталықта тәулігіне 3 мыңға жуық оқушы түрлі спорт және өнер секцияларына қатыса алады.
Сондай-ақ қонақтар 1000 орындық көпфункционалды «Өнер орталығын» аралап, онда симфониялық, ұлттық және эстрадалық бағыттағы мәдени іс-шаралар тұрақты өткізіліп келе жатқанын көрді.
Одан әрі делегация халықаралық қағидаларға сәйкес салынған 11 мың орындық Орталық стадионды көрді. Заманауи құрал-жабдықпен қамтылған нысанда күрес, таеквондо, ауыр атлетика, спорттық гимнастика және өзге де жаттығу залдары орналасқан.
Іссапар шағын өнеркәсіптік аймақ жұмысымен танысумен жалғасты. Мұнда 8 өндірістік цех іске қосылып, 50-ден астам адам жұмыспен қамтылған. Кәсіпкерлерге «Қызылорда» өңірлік инвестициялық орталығы арқылы жылдық 3 пайызбен жеңілдетілген несие берілгені атап өтілді.
Сондай-ақ делегация Сырдария өзенінің сол жағалауында орналасқан облыстық тарихи-өлкетану музейіне барды. Жаңа музейде 12 экспозициялық зал жұмыс істейді, қорында 70 мыңға жуық жәдігер сақталған. Құнды тарихи мұралардың қатарында «Шірік Рабат сақ жауынгері», «Сығанақ ханшайымы», «Түгіскен көсемі» және «Жетіасар ақсүйек әйелі» секілді реконструкциялар бар.
