Фото: Үкімет
Келер жылы тұрмысы төмен азаматтар бюджет еебінен медициналық сақтандыру жүйесімен қамтылады. Бұл туралы Үкімет отырысында Премьер-министр Олжас Бектенов айтты.
— Мемлекет басшысының тапсырмасы бойынша міндетті әлеуметтік медициналық сақтандыру жүйесін жаңғырту қолға алынды. Тиісті жұмыс жүріп жатыр. Ол медициналық көмектің қолжетімділігі мен сапасын арттыруға мүмкіндік береді. Сондай-ақ биыл шілде айында міндетті әлеуметтік медициналық сақтандыру жүйесін жетілдіруге бағытталған заң қабылданды. Ол медициналық көмектің бірыңғай пакетіне және сақтандыру моделіне кезең-кезеңмен көшуді қамтамасыз етеді, — деді Үкімет басшысы.
Оның атап өтуінше, заң көрсетілетін қызметтердің аясын кеңейтіп, сапасын арттырумен қатар бүкіл денсаулық сақтау саласының ұзақ мерзімді қаржылық орнықтылығына оң әсерін тигізеді.
— Біздің басты мақсатымыз – ашық, әділетті және ең бастысы, барлық азаматтар үшін қолжетімді денсаулық сақтау жүйесін қалыптастыру. 2026 жылдан бастап тұрмысы төмен азаматтар жергілікті бюджеттер есебінен медициналық сақтандыру жүйесімен қосымша қамтылатын болады. Осындай ауқымды өзгерістерді бірлесіп жүзеге асыруға күш жұмылдыру керек, — деді Олжас Бектенов.
Айта кетейік, 2026 жылы электронды денсаулық паспорттары азаматтарға толыққанды қолжетімді болады.
