Фото: Қызылорда облысы әкімінің баспасөз қызметі
Қызылорда облысының әкімі Нұрлыбек Нәлібаев мемлекет және қоғам қайраткері Мұхтар Абрарұлы Құл-Мұхаммедпен кездесті. Кездесуде аймақ басшысы елге еңбегі сіңген тұлғаның Сыр өңірінің әлеуметтік-экономикалық дамуына қосқан зор үлесін атап өтіп, құрмет көрсетті деп хабарлайды Қызылорда облысы әкімінің баспасөз қызметі.
Өңір басшысы өз сөзінде Батыр Бауыржан Момышұлының «Әр адамға бақыт пен бедел ақылмен, көп ізденіспен, адал еңбекпен келеді» деген ұлағатты сөзін мысалға келтіріп, осы қағиданы өмірлік ұстаным еткен аға буын өкілдерінің бірі ретінде Мұхтар Абрарұлының тұлғалық бейнесін ерекше атап өтті.
Нұрлыбек Нәлібаевтың айтуынша, Мұхтар Құл-Мұхаммед облысты басқарған кезеңде Сыр өңірінің әлеуметтік-экономикалық дамуына тың серпін беріп, маңызды жобалардың жүзеге асуына бастамашы болған.
2007 жылы облыс бюджеті 36 млрд теңге болса, небәрі бір жарым жыл ішінде 90 млрд теңгеге дейін артқан. Қысқа мерзім ішінде өңірдің өзекті мәселелерін республикалық деңгейде көтеріп, Қызылорда қаласындағы тұрғын үйлердің және инженерлік инфрақұрылым жүйелерінің жаңғыртылуына ықпал еткен.
Сондай-ақ, облыс аумағында 21 мектептің және Жаңақорғанда жыл бойы жұмыс істейтін балалар лагерінің құрылысы басталып, 1200 орындық 11 жаңа мектеп салынған. Денсаулық сақтау саласында да ауқымды жұмыстар жүргізіліп, Арал мен Қазалы аудандарында 100 орындық ауруханалар, ал Жаңақорғанда аудандық орталық аурухана ғимараты бой көтерген.
Аймақ басшысы Мұхтар Құл-Мұхаммедке өңірдің өркендеуіне қосқан еңбегі үшін 2022 жылы берілген «Қызылорда облысының құрметті азаматы» атағы мен Құрмет грамотасын салтанатты түрде табыстап, Сыр жұртшылығы атынан сый-құрмет көрсетті.
Мұхтар Абрарұлы әр жылдары Парламент Сенатының депутаты, Президенттің Баспасөз хатшысы мен кеңесшісі, Президент Әкімшілігі Басшысының орынбасары, Мемлекеттік хатшы қызметтерін атқарған. Сондай-ақ, төрт мәрте Мәдениет және ақпарат министрі болып, еліміздің мәдени және рухани дамуына, ұлттық құндылықтардың жаңғыруына зор үлес қосты. Екі рет Сенат депутаты ретінде азаматтардың өмір сапасын жақсартуға бағытталған маңызды заңдардың қабылдануына ықпал етті.
2007–2008 жылдары Қызылорда облысының әкімі қызметінде өңірдің әлеуметтік-экономикалық өсіміне серпін берген ілкімді жобаларды іске асырып, Сыр елінің дамуына тың леп әкелді.
Кездесуде қоғам қайраткерлері Жарылқасын Шәріпов, Ибрагим Әбибуллаев, Бекмырза Еламанов және Мәжіліс депутаты Мархабат Жайымбетов сөз алып, Мұхтар Абрарұлын шын жүректен құттықтады.
Өз кезегінде Мұхтар Құл-Мұхаммед көрсетілген құрмет пен ықылас үшін ризашылығын білдіріп, Сыр өңірінің тұрғындарына ізгі тілегін жеткізді.
