Фото: Қызылорда облысы әкімінің баспасөз қызметі
Облыс әкімі Нұрлыбек Нәлібаевтың қатысуымен Шиелі ауданында дене шынықтыру-сауықтыру кешені салтанатты түрде ашылды. Іс-шараға құқық қорғау органдарының басшылары, зиялы қауым өкілдері және аудан тұрғындары қатысты.
Аймақ басшысы өз сөзінде өңірдің әлеуметтік-экономикалық дамуына тоқталып, құттықтау тілегін жеткізді.
— Жақында Сыр өңіріне арнайы сапармен келген Мемлекет басшымыз алға қойылған жоспарларды уақытылы және сапалы жүзеге асырудың маңызын атап өтті. Инвестициялық климатты жақсарту, бизнес үшін қолайлы жағдай жасау жұмыстары жалғасуда.
Мемлекет тарапынан көрсетіліп отырған қолдау жаңа жетістіктерге жетелеп, жауапкершілікті арттырады. «Қуатты өңірлер — қуатты ел» қағидасы аймақтың дамуына серпін беріп, халық бірлігін нығайтады. 2022 жылдан бері облыс бюджетін 851 млрд. 300 млн. теңгеге жеткені, оның 56 пайызы әлеуметтік саланы дамытуға бағытталғаны тұрғындардың өмір сапасын арттыруға, өзекті жобаларды жүзеге асыруға мүмкіндік берді.
Бүгінгі кешеннің құрылысына 338 млн. теңге жұмсалды. Жаңа нысан дені сау ұлт қалыптастыруға бағытталып, жаттығуға келген жас спортшылардың арасында әлемдік ареналарда Қазақстанның көк туын желбірететін чемпиондардың шығуына жағдай жасайды.
Мемлекет балалар мен жасөспірімдердің спортпен еркін айналысуына қолайлы жағдай жасап, жаңа нысан барлық қалаушылар үшін қолжетімді етіп жабдықталды. Жаттығу залдары спорттың әр түрімен айналысушыларға қажетті құралдармен қамтамасыз етілген.
Іс-шара барысында ауданның әлеуметтік-экономикалық дамуына үлес қосқан ардагерлер және нысанды салып ел игілігіне тапсырған құрылысшылар облыс әкімінің Алғыс хатымен марапатталды. Сонымен қатар, облыстық ардагерлер кеңесінің төрағасы Серік Дүйсенбаев жиналғандарға бата берді.
