Фото: Қызылорда облысы әкімінің баспасөз қызметі
Қазақстан Республикасы Үкіметі атынан Өнеркәсіп және құрылыс министрі, облыс әкімі Нұрлыбек Нәлібаев және Roca Group халықаралық компаниясы мен Roca Қазақстан ЖШС бас директоры Даниэль Хурадо Эрнандес арасында Қызылорда облысында заманауи сантехникалық бұйымдарды өндіру және құрастыру зауытының құрылысын көздейтін инвестициялық келісімге қол қойылды.
Келісім аясында керамикалық санитарлық бұйымдар, ванна бөлмесіне арналған жиһаздар және өзге де өнімдер шығаратын кәсіпорын салу жоспарланып отыр. Жобаға 44,1 млрд теңгеден астам инвестиция тартылып, жылына 500 мыңға дейін өнім өндіру көзделген, сондай-ақ 300-ден астам жаңа тұрақты жұмыс орны ашылады.
Жаңа зауытта Roca Group компаниясының озық технологиялары енгізіліп, өндіріс толық автоматтандырылады, энергия тиімділігі мен экологиялық қауіпсіздік талаптары сақталады. Өндірілген өнімдер ішкі нарықпен қатар Орталық Азия елдеріне экспортталатын болады.
Инвестициялық келісім 25 жыл мерзімге жасалып, жоба аясында салықтық және кедендік преференциялар, инженерлік инфрақұрылыммен қамтамасыз ету және қазақстандық мамандардың біліктілігін арттыру шаралары қарастырылған.
Еске сала кетейік, Roca Group – 100 жылдан астам тарихы бар, әлемнің 170-тен астам елінде өнімін ұсынатын сантехникалық жабдықтар өндірісіндегі жетекші халықаралық компания.
