Фото: Қызылорда облысының Өңірлік коммуникациялар қызметі
Қызылорда облысының денсаулық сақтау саласында биыл тұрақты оң үрдіс қалыптасып отыр. Негізгі медициналық-демографиялық көрсеткіштер жақсарып, орташа өмір сүру ұзақтығы өткен жылғы 74,2 жастан 75,15 жасқа дейін өсті. Бұл туралы Өңірлік коммуникациялар қызметінде өткен баспасөз брифингінде облыстық денсаулық сақтау басқармасының басшысы Олжас Искаков мәлімдеді.
Оның айтуынша, саланың басты басымдығының бірі – ана мен бала денсаулығын сақтау. Жыл басынан бері өңірде 13 643 нәресте дүниеге келді. Бүгінде ана мен бала денсаулығын қорғау саласының материалдық-техникалық жарақтандырылуы 90,5 пайызға жетті. Жыл соңына дейін Көпбейінді облыстық балалар ауруханасына магнитті-резонансты томограф сатып алу жоспарланған. Сонымен қатар, мүмкіндігі шектеулі балаларға арналған оңалту қызметтерін кеңейту мақсатында Жаңақорған аудандық көпбейінді ауруханасы базасында «Қамқорлық» оңалту орталығы ашылып, осындай орталық Арал ауданында да жұмысын бастады.
Облыстық перинаталдық орталық жанынан «Бір күндік клиника» және «Ұрықты қорғау орталығы» жобалары іске қосылды. Сондай-ақ құны 145 млн теңге болатын жаңа ультрадыбыстық зерттеу аппараты алынды. Емханалар мен орталықтарда «Әйелдер консультациясы», «Ситуациялық орталық» және үздіксіз кәсіби дайындыққа арналған «Симуляциялық орталық» құрылды.
Сала мамандарының біліктілігін арттыруға да айрықша назар аударылуда. Биыл 41 дәрігер Германия, Ресей, Литва және Беларусь елдерінде тағылымдамадан өтті. Соңғы үш жылда жергілікті бюджет есебінен біліктілікті арттыруға 375 млн теңге бағытталып, оның аясында 84 акушер-гинеколог, 44 неонатолог, 42 реаниматолог және 19 педиатр оқытылды. Ресейлік профессорлардың қатысуымен неонатологтарға арналған көшпелі мастер-класс өткізіліп, оған 40 медицина қызметкері қатысты.
Мемлекет басшысының бастамасымен жүзеге асырылып жатқан «Ауылдық денсаулық сақтауды жаңғырту» ұлттық жобасы аясында өңірде 27 медициналық нысан пайдалануға берілді. Жақын күндері Арал және Қазалы аудандарындағы көпбейінді ауруханалардың қосымша ғимараттары іске қосылады деп жоспарлануда.
