Фото:Қызылорда облысының Өңірлік коммуникациялар қызметі
Қызылордадағы кәсіпкерлік саласы аймақ экономикасының дамуына серпін беретін негізгі бағыттардың бірі саналады. Тынымсыз еңбек пен жүйелі ізденістің арқасында отандық бизнес өркендеп, бәсекеге қабілеттілігін арттырып келеді. Осы жолда айрықша табысқа жетіп, өңір беделін көтеріп жүрген қызылордалық кәсіпкерлер Мемлекет басшысының қолынан «Алтын сапа» және «Парыз» марапаттарына ие болды. Жеңімпаздар бүгін Өңірлік коммуникациялар қызметінде баспасөз мәслихатын өткізіп, өз тәжірибелерімен және алған әсерлерімен бөлісті.
Облыстық кәсіпкерлер палатасының директоры Пірмұхаммед Сыздықтың айтуынша, шілде айында өткен «Қазақстанның үздік тауары» көрме-байқауында 9 үздік анықталып, кейін өңірлік комиссия «Алтын сапа» сыйлығына үміткерлердің материалдарын қараған. Нәтижесінде «Асыл Дән LTD» ЖШС «Жылдың үздік азық-түлік өнімдерін өндіруші» атанды, ал «Марал-Нұр» ЖШС «Қызмет көрсететін ең үздік кәсіпорын» номинациясын жеңіп алды. Сонымен қатар “Парыз-2025” байқауында «СКЗ-U» ЖШС «Экологияға қосқан үлесі үшін» аталымында жүлдегер болды.
«Марал-Нұр» ЖШС құрылтайшысы Мұрат Нұрсейітов бұл марапаттың ұзақ жылғы еңбектің нәтижесі екенін атап өтті. Компания 15 жылдан бері теміржол арқылы жолаушылар тасымалдаумен айналысып, бүгінде 226 адамды тұрақты жұмыспен қамтып отыр. Екі облысаралық бағыт бойынша жылына 800 мыңнан астам жолаушыға қызмет көрсетеді.
Ал «Асыл Дән LTD» ЖШС басшысы Нұрлан Алдамжаров үшін мұндай атақ — кәсіпорынның жоғары стандарттарға сай екенін дәлелдейтін маңызды көрсеткіш. 2013 жылдан бері жұмыс істейтін компания бүгінде 63 маманды жұмыспен қамтып, түрлі сорттағы жылтыратылған күріш пен өңделген өнім өндіреді. Сапаны қатаң бақылаудың арқасында олардың өнімдері елімізде ғана емес, шетелдік нарықта да сұранысқа ие.
