Фото: Қызылорда облысының өңірлік коммуникациялар қызметі
Қызылорда қаласында «Мемлекеттік тілдің мәртебесін арттырудың тиімді тәжірибелері» тақырыбында республикалық семинар-кеңес өткізілді. Іс-шараға ҚР Ғылым және жоғары білім министрлігінің Тіл саясаты комитеті, өңірлердегі тіл саясатын жүзеге асыруға жауапты басқармалар, тілдерді оқыту орталықтары, ұлттық компаниялардың өкілдері, филолог-ғалымдар, аудандық және қалалық мәдениет және тілдерді дамыту бөлімдерінің басшылары, тіл мамандары, тіл жанашырлары, «Халықаралық «Қазақ тілі» қоғамы» ҚБ облыстық және аудандық филиал төрағалары, сондай-ақ бұқаралық ақпарат құралдары мен мемлекеттік тілге жауапты қызметкерлер қатысты.
Семинар екі бағытта өтті: тәжірибелік және пленарлық.
Тәжірибелік бөлім «Анаға тағзым» ғимаратында ұйымдастырылып, қатысушылар мемлекеттік тілдің қоғамдағы орнын күшейтуге арналған түрлі практикалық жобалармен танысты.
Абай облысы әкімдігінің Мәдениет, тілдерді дамыту және архив ісі басқармасы «DIGITAL ABAI» IT-хакатоны арқылы тіл дамыту бойынша тәжірибесін ұсынды.
Қостанай облысының «Тілдарын» орталығы «Ұлттық диктант» жобасын ұйымдастырудың үздік үлгісін көрсетті.
Атырау облысы әкімдігінің мамандары әкімшілік құқық бұзушылықтарды бірыңғай платформада басқару практикасын таныстырды.
Солтүстік Қазақстан облысының өкілдері ресми интернет-ресурстарға мониторинг жүргізу және мемлекеттік мекемелерді тексеру нәтижелерін талдау тәжірибелерімен бөлісті.
Әр ұсыныстан кейін сұрақ-жауап алаңы ұйымдастырылып, өңірлерде қолдануға болатын тиімді тәсілдер талқыланды.
Семинардың пленарлық бөлімі Қызылорда облысы әкімдігінің ғимаратында жалғасты. Мұнда қатысушылар мемлекеттік тіл саясатын жүзеге асырудағы табысты тәжірибелер, ақпараттық кеңістіктегі тіл саясаты, ғылым тілінің қазақша дамуы, жасанды интеллект пен цифрлық технологиялардың көмегімен тілдің қолданыс аясын кеңейту мәселелерін сөз етті.
Шара қорытындысында мемлекеттік тілдің дамуына үлес қосқан бірқатар азаматтар ҚР Ғылым және жоғары білім министрлігінің «Ана тілін дамытуға қосқан үлесі үшін», «Ахмет Байтұрсынұлы» төсбелгілерімен, Құрмет грамоталарымен және Алғыс хаттарымен марапатталды.
