Фото: Қызылорда облысы әкімінің баспасөз қызметі
Қызылорда қаласының СПМК-70 шағын ауданында 1500 орынға арналған «Келешек мектебінің» ресми ашылу салтанаты өтті. Іс-шараға ҚР Оқу-ағарту министрі Жұлдыз Сүлейменова, Парламент Сенаты мен Мәжілісінің депутаттары Руслан Рүстемов, Мұрат Әбенов, Мұрат Ергешбаев, құқық қорғау құрылымдарының басшылық құрамы, зиялы қауым мүшелері мен ел ағалары қатысты, деп хабарлады облыс әкімінің баспасөз қызметі.
Аймақ басшысы қала халқын, ұстаздар мен оқушыларды жаңа білім ордасының ашылуымен құттықтап, жиналған көпшілікке ақжарма тілегін арнады.
«Президентіміз «Баланың бәрі бірдей. Ауыл баласы мен қала баласының білім алу мүмкіндігі тең болуы тиіс. «Келешек мектептері» жобасының түпкі мақсаты да – осы» деген еді. Бәсекеге қабілетті, заманауи талаптарға сай, жаңашыл буын қалыптастыру – мемлекеттің басты стратегиялық міндеттерінің бірі. Сыр өңірінде Президент пен Үкіметтің қолдауымен білім саласында кең ауқымды істер мен жаңа бастамалар жүзеге асуда.
Аймақтағы білім беру жүйесіне соңғы үш жылда 812 млрд. 245 млн. теңге, ал биылғы жылы 346 млрд. 800 млн. теңге бағытталды. Өткен жылы 31 млрд. 800 млн. теңгеге 13 жаңа білім беру нысаны іске қосылды. «Баршаңызды жаңа мектептің ашылуымен құттықтаймын! Бұл – тек ғимарат тұрғызу ғана емес, жаңа заманның алғыр оқушыларына тың мүмкіндіктер сыйлау. Жаңа мектеп әрбір шәкірттің үлкен арманын оятып, биік мақсаттарға жетелейтін құтты орынға айналсын! Санасы сергек, ойы озық, бәсекеге қабілетті жас ұрпақ көбейе берсін!»
— деді Нұрлыбек Машбекұлы.
Қызылорда облысында «Келешек мектептері» ұлттық жобасы аясында 54 млрд. 391 млн. теңгеге 10 мектеп салынды. 2023 жылдан бері 5 млрд. 700 млн. теңгеге 9 білім ордасының жанынан қосымша корпус тұрғызылды. Осылайша өңірдегі үш ауысымдық мектептер мәселесі толығымен шешілді.
Салтанатты жиында білім саласының дамуына үлес қосқан педагогтер мен «Келешек мектебінің» құрылысына жауапты мердігер ұйым қызметкерлері облыс әкімінің Алғыс хатымен марапатталды. Сонымен қатар Оқу-ағарту министрі Жұлдыз Досбергенқызы, Парламент Мәжілісінің депутаты Мұрат Абдуламитұлы, мемлекет және қоғам қайраткері, Қызылорда облысының құрметті азаматы Мұрат Бақтиярұлы жиналған қауымды құттықтап, ақжол тіледі.
