Фото: Қызылорда облысы әкімінің баспасөз қызметі
Өнер орталығында ұлы ағартушы, ақын, философ Абай Құнанбайұлының 180 жылдығына орай «Абай» операсының алғашқы көрсетілімі ұйымдастырылды. Премьераны облыс әкімінің бірінші орынбасары Данияр Жаналинов, облыс әкімінің орынбасары Мейрамбек Шермағанбет, мәслихат депутаттары, зиялы қауым өкілдері, қоғамдық кеңес мүшелері және қала тұрғындары тамашалады.
«Абай» трагедиясы — еліміздің өнер кеңістігінде ерекше орын алатын, халқымыздың мәдени өміріне серпін берген шоқтығы биік шығарма. ХХ ғасырдың 30-40 жылдары бастау алған бұл туынды М.Әуезовтің шығармашылық жолындағы маңызды белес болып, Абайдай данышпан тұлғаның бейнесі алдымен сахна арқылы халық жүрегінен терең орын алған еді. Мұхтар Әуезовтің либреттосына жазылған Ахмет Жұбанов пен Латиф Хамидидің әйгілі операсы тек ізгілік пен зұлымдықтың тартысын көрсететін қойылым ғана емес, қазақ халқының болмысы мен жан дүниесінің байлығын ашатын рухани айна, көшпелі мәдениеттің өзіндік салты мен дүниетанымын паш ететін тағылымды дүние.
Басты кейіпкердің ой тереңдігі, сөз нақтылығы, тіл шеберлігі мен азаматтық болмысы филармония әртістерінің орындауында өз мәнін жоғалтпай, жоғары деңгейде көрерменге ұсынылды.
Айрықша классикалық кешті халықаралық және республикалық байқаулардың лауреаты Рустам Рысмағамбетовтің дирижерлік етуімен облыстық симфониялық оркестр сүйемелдеді. Оркестрдің көркемдік жетекшісі және бас дирижері — Қазақстанның еңбек сіңірген қайраткері, профессор Мүсілім Әмзе. Қойылымға аралас хор ұжымы (көркемдік жетекшісі — А.Қуаныш), «Томирис» би ансамблі (жетекшісі — халықаралық және республикалық конкурстардың жеңімпазы М.Тойбазарова), «Ai-Aru» заманауи би тобы (жетекшісі — халықаралық және республикалық конкурстардың лауреаты З.Стықбаева), «Әдемі» балалар музыкалық театр-студиясы (жетекшісі — Қ.Боранбаев) және филармония солистері қатысып, көрермендерге мазмұны терең, философиялық ойға толы мәдени кеш ұсынды.
Операның қоюшы режиссері — Мәдениет саласының үздігі, «Ерен еңбегі үшін» медалінің иегері Әзиза Іздіқұлова.
Абайдың өмір жолы мен шығармашылығын айшықтайтын бұл қойылым ұлттық сана-сезімді күшейтіп, қоғамды бірлікке шақыратын мәні зор өнер туындысы болып табылады. Абай мұрасын түрлі форматта дәріптеу — бүгінгі қазақ руханияты үшін аса маңызды міндет.
