Фото: Қызылорда облысының Өңірлік коммуникациялар қызметі
Қызылорда облысында соңғы жылдары сан түрлі құрылыс объектілері салынғанымен, өңірдің сәулеттік келбеті айтарлықтай жақсара түсті. Бұған құрылысшылардың ерен еңбегі зор ықпал етті. Биыл пайдалануға берілген тұрғын үй көлемі 10 айдың қорытындысы бойынша 766,7 мың шаршы метрге жетіп, жоспар 110 пайыз деңгейінде орындалды. Жыл аяғына дейін барлық қаржыландыру көздері есебінен 870 мың шаршы метр баспана тапсыру жоспарланып отыр. Сонымен қатар жаңа стадион, “Келешек” мектептері және өзге де нысандар биылғы жылдың жобалары қатарынан орын алды. Он ай ішінде атқарылған жұмыстар жөнінде облыстық құрылыс, сәулет және қала құрылысы басқармасының басшысы Ерлан Төрәлиев баяндады.
–2025 жылға жалпы 166,8 млрд теңге қарастырылған. Бұл қаражатқа облыс аумағында 96 жобаның құрылысын жүргізу және 2980 пәтер сатып алу жоспарланған. «Келешек мектеп» ұлттық жобасы аясында 6900 орынға арналған 10 мектептің құрылысы қолға алынған болатын. Қызылорда облысы республика бойынша Президент тапсырмасын алғаш орындап, жоспарланған 10 білім ошағын толық аяқтап, халық игілігіне ұсынды. Бұдан бөлек, білім беру саласында физика-математикалық бағыттағы мектеп, Музыкалық колледж, Сұлтан Бейбарыс пен Назарбаев көшелерінің қиылысында орналасқан Шығармашылық инновациялық орталығы, сондай-ақ Шиелі ауданындағы 200 орындық Оқушылар үйі мен 50 орындық өнер мектебінің құрылысы аяқталып, пайдалануға берілді. Сондай-ақ Арал ауданының Жалаңаш ауылындағы 150 орындық мектеп биылғы жылдың соңына дейін құрылысын тәмамдайды.
Денсаулық сақтау бағытында Сырдария өзенінің сол жағалауында бір ауысымда 100 келуші қабылдайтын емханасы бар 300 орындық онкологиялық бөлімшесімен көпсалалы аурухана құрылысы қарқынмен жүргізілуде. Арал және Қазалы аудандық орталық ауруханаларын қайта жаңғырту және Қамқорлық орталығына бейімдеу жұмыстары жыл соңына дейін аяқталады. Шиелі және Жаңақорған аудандарындағы орталық аурухананы реконструкциялау және Шиелі кентіндегі инфекциялық аурухана құрылысы толық бітті.
Мәдениет саласында сол жағалаудағы Тарихи-өлкетану музейі, Арал, Қазалы және Сырдария аудандарындағы Руханият орталықтары мамыр айында іске қосылды. Достық үйінің құрылысын жыл соңына дейін тәмамдау жоспарланған. Ал спорт саласында былтыр басталған стадион құрылыс жұмыстары биыл мерзімінен бұрын аяқталып, 11 мың орындық нысан қазан айында халыққа пайдалануға берілді. Сонымен қатар облыс бюджеті есебінен «Қызылорда Арена» спорт кешенінің, ал «Қазақстан Халқына» қоры арқылы сол жағалаудағы спорт кешенінің құрылысы белсенді жүргізілуде,
– деді Ерлан Кәрімбекұлы.
