Фото: Қызылорда облысы әкімінің баспасөз қызметі
Облыс әкімі Нұрлыбек Нәлібаевтың қатысуымен Қармақшы ауданының орталығы — Жосалы кентінде әлеуметтік осал санаттағы тұрғындарға жаңадан бой көтерген үйлердің кілті табысталды. Шараға Парламент Сенаты мен Мәжілісінің депутаттары Руслан Рүстемов, Мұрат Әбенов, Мұрат Ергешбаев, құқық қорғау органдарының бірінші басшылары, ел ағалары және ауыл тұрғындары қатысты.
Аймақ басшысы жаңа қоныс иелерін құттықтап, өңірде жүргізіліп жатқан ірі жобалар, құрылыс саласының қарқыны және тұрғын үй саласындағы оң өзгерістер туралы айтты.
«Мемлекет басшымыз Қасым-Жомарт Кемелұлы халықты баспанамен қамтамасыз ету — мемлекеттік саясаттың маңызды бағыты екенін атап өтті. Өңірімізде құрылыс жұмыстары белсенді түрде жүріп жатыр. 2022 жылдан бері 200-ге жуық әлеуметтік нысан салынып, халық игілігіне қызмет етуде.
2022-2024 жылдары тұрғын үй кезегінде тұрған азаматтарға 5 мыңнан астам пәтер берілді. Соңғы екі жылда облыс тарихында алғаш рет барлық аудандарда бір жарым мыңға жуық пәтер салынып, жергілікті тұрғындарға табысталды. Биыл 3600 пәтерлік тұрғын үй құрылысын жүргізуге бюджеттен 58 млрд. 785 млн. теңге қарастырылды. Оның ішінде аудандарда 322 пәтерлік 161 тұрғын үй бой көтеріп жатыр.
Қармақшы ауданында да 2023-2024 жылдары 2 млрд. 848 млн. теңгеге 207 пәтерлік 103 үй сатып алынып, кезекте тұрғандарға берілді. Бүгін сіздерге тағы 50 пәтерлік 25 жаңа үйді тапсырамыз.
Бүгін — мемлекет қамқорлығын сезінген баршаңыз үшін қуанышты күн. Шаңырақ көтеру — әр отбасының ең ізгі арманы. Жаңа үйлеріңіз құтты болсын! Берекелі, тыныш, ырысты қонысқа айналсын!»
— деді Нұрлыбек Машбекұлы.
Айта кетейік, 2023 жылы Қармақшы ауданының Тұрмағамбет, Ақжар, Дүр Оңғар ауылдарында дәрігерлік амбулаториялар ашылды. Өткен жылы Қуаңдария мен Қармақшы ауылдарында фельдшерлік-акушерлік бекеттер салынды.
«Руханият жылы» аясында аудан орталықтарында бой көтерген «Руханият орталықтарының» бірі Қармақшы ауданында іске қосылды. Сонымен қатар «Ауыл — ел бесігі» бағдарламасы бойынша Дүр Оңғар, ІІІ Интернационал, Ақай ауылдарында жаңа спорт кешендері салынды.
Салтанатты шарада ауданның әлеуметтік-экономикалық дамуына үлес қосқан ардагерлер мен мердігер мекеме өкілдері облыс әкімінің Алғыс хатымен марапатталды. Парламент Мәжілісінің депутаты Мұрат Ергешбаев көпшілікті құттықтап, жылы лебізін білдірді.
Рәсімнен соң аймақ басшысы ауыл тұрғындарымен және ардагерлермен кездесіп, елдің әлеуметтік-экономикалық бағыты жөніндегі сұрақтарға жауап беріп, ұсыныстарын тыңдады.
