Фото: Қызылорда облысының Өңірлік Коммуникациялар Қызметі
Қазіргі уақытта интернет арқылы жасалатын алаяқтық қылмыстары көбейіп, азаматтар үшін айтарлықтай қауіп тудыруда. Онлайн сауда, қаржылық операциялар және түрлі қызметтерді пайдалану ыңғайлы болғанымен, кибералаяқтар жаңа тәсілдермен қылмыс жасауда. Қызылордада 2023 жылдың басынан бері интернет алаяқтық бойынша 523 дерек тіркелген.
Полиция департаменті тергеу басқармасының киберқылмыстарды тергеу бөлімінің бастығы Айдос Ақбаевтың айтуынша, алаяқтар интернеттің дамуымен бірге жаңа әдістер ойлап табуда. Әлеуметтік желілер мен ақпараттық кампаниялар арқылы азаматтар үнемі ескертіліп, алаяқтықтың алдын алу шаралары жүргізілуде. Дегенмен, алаяқтардың құрбаны болып қалған азаматтар саны азаймай отыр.
Айдос Ақбаев жаңа «Дроппер» ұғымының пайда болуын атап өтті. Бұл – интернет алаяқтарына көмек көрсететін немесе оларға қатысушы тұлғалар, яғни олар жәбірленушілердің шоттарындағы қаражаттарды шетелдік есепшоттарға аударып алады немесе банкоматтардан шешіп алады.
Бұл мәселелердің алдын алу үшін Қазақстанда Қылмыстық кодекске жаңа бап енгізілді, оған сәйкес «дропперлерге» қатысты айыппұл мөлшері 160 айлық есептік көрсеткіштен бастап, жеті жылға дейін бас бостандығынан айыру жазасы қарастырылған.
