100bai.kz – бұл тек ақпараттық портал ғана емес, бұл бір адамның мағыналы өмір жолынан бастау алған үлкен идея. Сайттың атауы да жай таңдалған жоқ — «Жүзбай» есімімен байланысты. Бұл — елге еңбегімен танылған, сан қырлы тұлға Танрықбаев Жүзбай Ибрахимұлының құрметіне қойылған атау.
Жүзбай Ибрахимұлы – ел жанашыры, ардақты азамат
Жүзбай Ибрахимұлы 1950 жылы 10 мамырда Қызылорда облысы, Шиелі ауданының бұрынғы Құмсуат, қазіргі Жаназар батыр ауылында дүниеге келген. Білімге құштарлығы ерте байқалған ол 1968 жылы Орджоникидзе атындағы қазақ орта мектебін үздік бітіріп, техника мен ауыл шаруашылығы саласында білімін жалғастырды.
Ол еңбек жолын қарапайым жүргізушіліктен бастап, «Қазсельхозтехника» автобазасының директоры, облыстық автомобиль басқармасының партком хатшысы сынды жауапты қызметтерге дейін көтерілді. Тәуелсіздік алғаннан кейін де мұнай саласында басшылық лауазымдар атқарып, ел экономикасына өз үлесін қосты.
Еңбегі мен елге сіңірген қызметі бағаланған
Жүзбай аға – «Ерен еңбегі үшін» медалінің иегері, Қызылорда қаласы мен Шиелі ауданының құрметті азаматы. Ол «ҚР Құрметті автокөлікші», «Облыстың құрметті ардагері», «Еңбек ардагері», «Қызылорда қаласының 200 жылдығы» секілді көптеген мемлекеттік және мерекелік марапаттарға ие болған.
2023 жылы 25 қарашада тағы да «Ерен еңбегі үшін» медалімен марапатталды. Бұл – оның ұзақ жылғы тынымсыз еңбегінің, азаматтық позициясының және қоғамға қосқан үлесінің айғағы.
Шығармашылық тұлға
Жүзбай Танрықбаев – отыздан астам кітаптың авторы. Оның шығармалары туған жерге деген махаббатын, ұлттық болмыс пен тарихи санаға құрметті паш етеді. Белгілі еңбектерінің қатарында: «Балалық шағым – бал дәуренім», «Сыр саңлақтары», «Туған жерді ту еттім», «Тағдырлар тоғысы», «Өмірдің өз шындығы» және тағы басқалар бар.
Ол – республикалық және облыстық басылымдардың негізін қалаушы, бас редакторы, ҚР Журналистер одағының мүшесі. Қоғамдық істерде де белсенді – ардагерлер кеңесі, қоғамдық кеңестер мен түрлі бірлестіктердің белді мүшесі.
Ұрпаққа үлгі
2025 жылы 10 мамырда өзі білім алған И.Әбдікәрімов атындағы политехникумда «Жүзбай Танрықбаев атындағы дәрісхана» ашылды. Бұл — білім мен руханият жолындағы еңбегінің тағы бір жарқын көрінісі.
📍 Қызылорда қаласы
🏡 КБИ, Ақмаржан 28, Мыңбұлақ 22
📞 Байланыс: +7 705 106 5956
