Фото: Қызылорда облысы әкімінің баспасөз қызметі
Облыс әкімі Нұрлыбек Нәлібаевтың қатысуымен Шиелі ауданына қарасты Бестам ауылында 150 орындық жаңа клубтың пайдалануға беру рәсімі ұйымдастырылды. Шараға құқық қорғау органдарының басшылары, зиялы қауым өкілдері және ауыл халқы қатысты.
Аймақ басшысы өңірде жүзеге асқан оң өзгерістерге тоқталып, жиналғандарға өз құттықтауын жеткізді.
«Президентіміздің Сыр өңірінің өсім қарқынына, көрсеткен еңбегімізге берген жоғары бағасы — баршамыз үшін үлкен мәртебе.
Мемлекет басшысы Қасым-Жомарт Кемелұлының 2022 жылдың қарашасында Президент қызметіне кіріскеннен кейінгі ең алғашқы қол қойған Жарлығы — «Ауылдық аумақтарды дамытудың 2023-2027 жылдарға арналған тұжырымдамасы» болды.
Ауылдарды өркендету — мемлекеттік саясаттың маңызды стратегиялық мақсаты саналады. Президент Үкімет пен облыс әкімдеріне ұсынылған қолдауды ұтымды пайдаланып, ауыл тұрғындарының кірісін арттыру және экономикасын жоғары деңгейге көтеру міндетін жүктеді. Қазір облыстың 447 мың тұрғыны (жалпы халық саны 845 мың адам), яғни 53 пайызы ауылдық жерде өмір сүреді.
Биыл Шиелі ауданының бюджеті 17 млрд теңгеден асты. Энергетика, ауыз су, газдандыру бағыттарында жүйелі жұмыстар атқарылып келеді. Шиелі электр желісінің қосалқы станциясы 4 млрд 480 млн теңгеге толық жаңартылды.
Осы игі істердің жалғасы ретінде бүгін Бестам ауылында 429 млн теңгеге тұрғызылған 150 адамдық жаңа клубты халық игілігіне ұсыну үшін жиналып отырмыз.
Ауылдық клуб мәдени жаңғырудың ордасына айналсын! Қуаныштарыңыз құтты болсын!», — деді Н. Нәлібаев.
Шиелі ауданында жеке инвесторлар есебінен 6 млрд теңгеге қуаттылығы 20 МВт болатын, құны 1 млрд 500 млн теңге болып есептелетін күн-электр станциялары салынып жатыр. Аудан халқының 100 пайызы сапалы ауыз суға қол жеткізіп, 16 елді мекен табиғи газға қосылған. Жұқпалы аурулар бөлімшесінің жаңа ғимараты, аудандық аурухана жанынан салынған қосымша нысан пайдалануға берілді. Онда жаңа МРТ аппараты орнатылуда. Заманауи талаптарға сай бұл мекемелер тұрғындарға сапалы медициналық қызмет көрсетіп келеді.
Биылғы оқу жылында 200 орындық «Оқушылар үйі» мен 50 орындық «Өнер мектебі» іске қосылды. Жыл аяқталғанша кезекте тұрған азаматтарға 52 пәтерден тұратын 26 жаңа тұрғын үй табысталмақ.
Ал бүгін ашылған клубтың бас мердігері — «Дәнекер» ЖШС. Ғимаратта ән, хор, би, қолөнер үйірмелері жұмыс істеп, кітапхана орналасады. Бұл орын ауыл жастарының басын қосатын, өнерге бағыттайтын рухани орталыққа айналады.
Жиында ауданның әлеуметтік-экономикалық алға басуына үлес қосқан ардагерлер мен жаңа нысанды салуға атсалысқан құрылысшылар облыс әкімінің Алғыс хатымен марапатталды. Еңбек ардагері Әшім Оразбекұлы жаңа нысанға ақ батасын берді.
