Фото: Polisia.kz
29 қазан – Қазақстан Кәсіпкерлері күні қарсаңында Қызылорда облысы бойынша Қылмыстық-атқару жүйесі департаментінің 37 мекемесінде мерекелік іс-шара өтті деп хабарлайды Polisia.kz. Шараға мекеме басшылығы мен сотталған азаматтарды жұмыспен қамтып жүрген жеке кәсіпкерлер қатысты.
Бүгінде облыс аумағындағы 18 кәсіпкердің өндіріс орындарында жазасын өтеушілер еңбек етеді. Олар жиһаз жасау, тігін, автокөлік жөндеу және құрылыс материалдарын шығару сияқты бағыттарда жұмыс істеп келеді.
Іс-шара барысында сотталған азаматтарды еңбекке тартуға белсенді атсалысқан кәсіпкерлерге мекеме бастығы Абай Битаевтың алғыс хаттары табысталды. Абай Битаев марапаттау барысында былай деді:
— Сотталғандарды еңбекке баулу – олардың қоғамға бейімделуінің маңызды тетігі. Біз кәсіпкерлермен әріптестікті әрі қарай дамытамыз.
Марапат иелерінің бірі, жеке кәсіпкер Орынбасар Тұрғанбекұлы да өз алғысын білдіріп, бұл серіктестікті қоғам алдындағы борыш ретінде атап өтті. Сонымен қатар бір рет қателікке жол бергендерге жаңа өмір бастауға мүмкіндік беретін ізгі іс екендігін және де осындай ынтымақтастықты әрі қарай жалғастыратындықтарын айтып өтті.
Қызылордадағы бұл игі бастама – қоғам мен бизнестің ортақ жауапкершілігінің көрінісі. Кәсіпкерлер мен қылмыстық-атқару жүйесі арасындағы серіктестік тек еңбекпен қамтуды ғана емес, адам тағдырын өзгертуге бағытталған әлеуметтік миссияны да атқарып отыр.
