Фото: Қызылорда облысының Өңірлік Коммуникациялық қызметі
«Жастардың бастамасы: даму мен серпін» тақырыбында өткен жиынды облыстық жастар ресурстық орталығы ұйымдастырды.
Оған арнайы келген қонақтар қатарында Қызылорда облысы әкімінің орынбасары Шермағанбет Мейрамбек Зинабдинұлы, жас кәсіпкер Нұрдаулет Болатбекұлы, «Салауатты өмір сақшылары» қозғалысының жетекшісі Алдаберген Нұрқанат, «Студенттер Альянсы» ҚОФ төрағасы Расул Базарханұлы және 2025 жылдың «Күміс домбыра» иегері, ақын әрі жыршы Бексұлтан Орынбасар болды. Олар жастарға бағыт-бағдар беріп, табысқа жетудің өз тәжірибелерімен бөлісті.
Форум жұмысы екі секция аясында өрбіді. Алғашқы «Жастар және мемлекеттік басқару: Болашақ көшбасшылары» тақырыбындағы секцияда мемлекеттік қызметтің маңызы, жастардың басқару жүйесіне араласу мүмкіндіктері кеңінен талқыланды. Спикер облыстық жастар ресурстық орталығының директоры Басаров Алиби Төлепбергенұлы қатысушылармен тәжірибе бөлісіп, жастарды ел басқару ісіне тартудың өзектілігіне тоқталды.
Екінші секция «Жасанды интеллект: Киберқауіпсіздік» тақырыбына арналды. Мұнда IT саласының заманауи бағыттары, цифрлық қауіпсіздік пен жастардың цифрлық сауаттылығын арттыру мәселелері сөз болды. Секцияға Қорқыт ата атындағы Қызылорда университетінің студенттері Нұрбек Әділбаев пен Нұрбол Оңалбаев спикер ретінде қатысып, жасанды интеллекттің мүмкіндіктері мен қауіптері жөнінде ой бөлісті.
Іс-шара соңында жастар саясаты саласында белсенділік танытқан бірқатар жас марапатталды. Аталған басқосу жастар арасында тың идеялар мен серпінді бастамалардың туындауына жол ашып, өңірдегі жастар қозғалысының дамуына тың серпін берді.
