Фото: Қызылорда облысы әкімінің баспасөз қызметі
ҚР Премьер-министрінің кеңесшісі Ералы Тоғжанов облыс әкімінің орынбасары Ардақ Зебешевпен бірге Қызылорда қаласындағы «Сыр жұлдыздары» шығармашылық-инновациялық академиясы мен «Қызылорда нан» жауапкершілігі шектеулі серіктестігінің өндірістік кешенін аралады. Сапар барысында биыл пайдалануға берілген нысандардың жұмысымен танысып, олардың өңірдің әлеуметтік-экономикалық дамуына қосып отырған үлесі бағаланды.
Балалар мен жасөспірімдерге арналған «Сыр жұлдыздары» шығармашылық-инновациялық академиясы бір мезетте 500 балаға, тәулігіне 3 мыңға жуық оқушыға қызмет көрсетуге қауқарлы. Академияда спорттық және шығармашылық бағыттағы заманауи инфрақұрылым қалыптасқан. Мұнда бассейн, жекпе-жек және топтық жаттығу залдары, көркем гимнастика мен фитнес алаңдары, сондай-ақ робототехника, жасанды интеллект, биотехнология, 3D модельдеу, киберспорт және өнер бағытындағы кабинеттер жұмыс істейді.
Бала тәрбиесінде бос уақытты тиімді ұйымдастырудың маңызы зор. Осы тұрғыда «Сыр жұлдыздары» академиясы қызылордалық балалардың қабілетін дамытуға және болашақ мамандығын таңдауға бағыт беретін маңызды орталыққа айналып келеді.
Сонымен қатар, делегация «Қызылорда-нан» ЖШС-нің нан-тоқаш, кондитерлік және макарон өнімдерін өндіретін кешенінде болды. Биыл қазан айында іске қосылған кәсіпорын өңір тұрғындарын сапалы нан өнімдерімен қамтамасыз етуге бағытталған. Өндіріс процесі толық автоматтандырылған, дайын өнімнің 30 пайызы кәсіпорынның жеке сауда желілері арқылы, ал 70 пайызы қала мен оған іргелес елді мекендердегі сауда орындарына жеткізіледі.
Сапар қорытындысында Үкімет басшысының кеңесшісі өңірде жүзеге асырылып жатқан серпінді жобаларға оң баға берді.
