Фото: Қызылорда облысының Өңірлік Коммуникациялар Қызметі
Қызылорда облыстық көпбейінді ауруханада үш науқасқа бүйрек алмастыру отасы жасалды. Алғашқы трансплантация 41 жастағы әйел адамға, екіншісі 20 жастағы жігітке, үшіншісі 43 жастағы әйел адамға жүргізілді. Донорлар ретінде науқастардың жақын туыстары – ағасы, анасы және жұбайы қатысты.
Ота облыстық көпбейінді аурухананың бас дәрігері, трансплантолог, PhD Жасұлан Баймахановтың жетекшілігімен, бас дәрігердің хирургия жөніндегі орынбасары, PhD Ербол Серікұлы және «А.Н. Сызғанов атындағы Ұлттық ғылыми хирургия орталығы» АҚ трансплантологтары Ернұр Белгібаев пен Елшат Нәбиевтің қатысуымен өтті.
Қазіргі уақытта барлық науқастардың жағдайы орташа ауыр, қажетті ем-шаралар жүргізілуде. Бұған дейін аталған медициналық мекемеде 8 бүйрек және 1 бауыр трансплантациясы сәтті жүзеге асырылған.
