Фото: Қызылорда облысы әкімінің баспасөз қызметі
ҚР Президентінің кеңесшісі Бақытжан Сәпиевтің жетекшілігімен өткен өңір басшыларымен кеңесте су тасқыны қаупі, туристік аймақтардың дамуы, экологиялық мәдениетті нығайту, «Таза Қазақстан» тұжырымдамасының жүзеге асуы және жекеменшік мектептердің атауын реттеу мәселелері қаралды. Жиынға облыс әкімінің бірінші орынбасары Данияр Жаналинов онлайн форматта қатысты.
10 желтоқсандағы дерек бойынша, Шардара су қоймасынан Сырдарияның төменгі бөлігінен секундына 150 текше метр су жіберілуде. Өткен жылы дәл осы күні бұл көрсеткіш 300 текше метр болған. Қоймадағы су көлемі 1 828 млн текше метрді құрайды, былтыр бұл көрсеткіш 2 594 млн текше метр болған. Облыс аумағына тәулігіне 59,3 текше метр су түсуде, ал 2023 жылдың осы уақытында 511 текше метр болған.
Өңірде су басу қаупінің алдын алуға бағытталған арнайы жоспар дайындалған. Қауіпті аймақтарға жауапты мекемелер бекітіліп, олардың иелігінде 268 арнайы техника мен 1 195 маман дайын тұр. Су тасқынына қарсы қор жеткілікті: 100,6 тонна жанармай, 96 099 қап және өзге қажетті материалдар бар. Тұрғындарды көшіру бекеттері әзір, сала мамандары тәулік бойы кезекшілік жасауда. Су деңгейіне қатысты жағдай үнемі бақылауда.
Биыл туризм саласын жандандыруға айтарлықтай қадамдар жасалды. Жазғы маусымда 15 демалыс орны қызмет көрсетті, ал туристерге арналған халықаралық деңгейдегі Rixos және Pana қонақүйлері салынып жатыр. 10 айда туризмге 49,2 млрд теңге инвестиция тартылып, бұл өткен жылмен салыстырғанда 87 пайыз өсім көрсеткен. 3-тоқсанда өңірге келген туристер саны 157 500 адамға жетіп, 35 пайызға артқан.
Президент бастамасымен жүзеге асырылып жатқан «Таза Қазақстан» бағдарламасы аясында өңірде санитарлық тазалықты жақсарту, абаттандыру және халыққа қолайлы орта қалыптастыру бағытында жүйелі жұмыстар жүргізілуде. Мемлекеттік қаржыландырумен қатар, кәсіпкерлердің қолдауымен орталық алаңдар, ойын және спорт алаңдары жаңартылып, тұрғын үйлер мен әлеуметтік нысандар заманауи талаптарға сай жөнделді.
Қазіргі таңда атауы өзгеруі тиіс жекеменшік мектептердің құрылтайшыларымен түсіндіру жұмыстары жүргізіліп жатыр.
