Фото: Қызылорда облысының Өңірлік Коммуникациялар қызметі
Облыс әкімінің орынбасары Мейрамбек Шермағанбет төрағалық еткен кадрлық өзгерістерге арналған жиында Қорқыт ата атындағы Қызылорда университетінің Басқарма Төрағасы – Ректоры Бейбіткүл Сәрсемханқызын жаңа қызметіне құрметпен шығарып салды.
Мейрамбек Зинабдинұлы Бейбіткүл Сәрсемханқызының басшылығы кезеңінде өңірдегі іргелі білім ордасында кең көлемді жұмыстар жүзеге асқанын, ғылыми бастамаларға серпін беріліп, жас зерттеушілер үшін қолайлы орта қалыптасқанын атап өтті.
«Бейбіткүл Сәрсемханқызы жауапты қызметте өзін білікті, ұйымдастырушылық қабілеті жоғары жетекші ретінде танытты. Аймаққа қажетті кадрларды даярлау, студенттердің оқу процесін жүйелеу және білім беру инфрақұрылымын жаңғырту бағытында табанды еңбек етті. Қорқыт ата университеті республикадағы озық оқу орындарының қатарынан көрініп, жоғары нәтижелерге қол жеткізді», – деді ол.
Білім саласындағы сіңірген еңбегі мен аймақ дамуына қосқан үлесі үшін Бейбіткүл Сәрсемханқызына Қызылорда облысының ең жоғары марапаты – Құрмет грамотасы салтанатты түрде табысталды.
