Өмірін өскелең ұрпақ тәрбиесіне арнап, мектептің дамуына зор үлес қосқан тәжірибелі басшы — Молдабаева Гауһар Рүстемқызын зейнетке шығарып салу кеші ерекше ілтипатпен аталып өтті. Жылдар бойғы жауапкершілік пен табандылықтың жемісі ретінде ұжымның ыстық алғысы мен құрметі айрықша көрініс тапты.
Шара барысында Гауһар Рүстемқызының ұзақ жылдық еңбек жолы мен білім саласына қосқан үлесі кеңінен айтылды.
Гауһар Рүстемқызы өзінің еңбек жолын Сырдария аудандық оқушылар сарайында меңгеруші қызметінен бастап, ұстаздық қызметін Ж. Махамбетов атындағы №43 орта мектебінде жалғастырды. 2005-2014 жылдары Ә. Құдабаев атындағы №197 орта мектеп директорының оқу-тәрбие ісі жөніндегі орынбасары, 2014 жылдан бастап аталмыш мектептің директоры болды. 2015-2022 жылдары Б. Ермекбаев атындағы №271 орта мектептің директоры қызметін атқарса, 2022 жылдан бастап батыр есімі берілген іргелі білім ұясы – №43 орта мектептің директоры болып абыройлы еңбек етті.
Кәсіби жолындағы адалдығы мен жауапкершілігі үшін Г. Рүстемқызы білім және ғылым қызметкерлерінің кәсіподағының төсбелгісімен, сондай-ақ Оқу-ағарту министрлігінің «Білім беру ісінің үздігі» төсбелгісімен марапатталған. Оның басшылығымен №43 орта мектеп ұжымы «Ынтымағы жарасқан ұжым» номинациясының иегері атанды.
Әріптестері Гауһар Рүстемқызының еңбекқорлығын, басқарушылық қабілетін ерекше атап өтті. Бұрын бірге еңбек еткен ұжымдастары оның жастық шағында Сырдария ауданындағы тынығу лагерін басқарғанын, сол кезеңнен бастап-ақ көшбасшылық қабілетінің айқын байқалғанын жылы естелік ретінде бөлісті.
Шараға №43 орта мектеп ұжымымен қатар Г. Рүстемқызының отбасы мүшелері, бұрын қызмет атқарған мектеп ұжымдары, Қызылорда қаласының білім басқармасы басшылығы, сондай-ақ Қызылорда қаласының құрметті азаматы, ҚР Журналистер одағының мүшесі, Гауһар Рүстемқызының бауыры — Ж. Таңрықбаев қатысты.
Кеш соңында сөз алған әріптестері Гауһар Рүстемқызының адамгершілігін, парасаттылығын, талапшылдығын және ұжымдық мәдениетті қалыптастыруға қосқан өлшеусіз үлесін айрықша атап өтті. Ұстаздықты абыройымен атқарып, басшылық қызметте биік жауапкершілікті арқалаған жанның өмірлік жолы кейінгі буынға үлгі екені айтылды.
Ұстаздық — жүрек жылуын аямай, білім мен тәрбие берудің ең қасиетті жолы. Әр шәкіртінің жетістігімен қуанып, әр бастамасына күш-қуат беруге дайын болу – тек нағыз жанкешті педагогқа тән қасиет. Осындай жоғары адамгершілік пен ұлағатты ұстанымдарды өмір бойы серік еткен Гауһар Рүстемқызының еңбегі мектеп тарихында да, жүректерде де мәңгі сақталмақ.
