Фото: Қызылорда облысы әкімінің баспасөз қызметі
Қызылордада Өнер орталығында өткен салтанатты шарада аймақтың еңбек озаттарын марапаттау рәсімі өтті. Оған Парламент Сенаты мен Мәжілісінің депутаттары, құқық қорғау органдарының басшылары, зиялы қауым өкілдері, қоғам қайраткерлері қатысты.
Облыс әкімі Нұрлыбек Нәлібаев өз сөзінде өңірдің дамуындағы жетістіктерді атап өтіп, Сыр халқының бірлігі мен еңбегіне жоғары бағасын берді. Ол Президенттің аймаққа жасаған екі сапарының өңірдің мәселелерін шешуге оң ықпал еткенін және өңірдің дамуындағы маңызды көрсеткіштердің өскенін атап өтті. Бюджет көлемі 851 млрд. теңгеге жетіп, инвестиция көлемі 720 млрд. теңгеге ұлғайды.
Шара барысында бірқатар азаматтар мемлекеттік наградалармен марапатталды. Олардың қатарында Бекмырза Еламанов, Мұрат Сәрсенбаев, Әліби Бекжанов, Алган Сарачоғлы, Манарбек Еспенбетов, Роза Иманова, Оңғарбек Саймағамбетов, Исламғали Қозыбақов бар. Сонымен қатар, бірқатар азаматтар «Ерен еңбегі үшін» және «Шапағат» медальдарымен марапатталды.
Іс-шара Парламент депутаты Наурызбай Сейтқалиұлының құттықтау сөзінен кейін өнерпаздар Мұхтар Ниязов пен Бексұлтан Орынбасаровтың концерттік бағдарламасына ұласты.
