Қазалы стансасындағы теміржол вокзалы – тарих пен тіршіліктің тоғысқан тұсы. ХХ ғасырдың басында іргетасы қаланған бұл сәулет нысаны тек көлік қатынасының емес, өңір өркениетінің де айнасы саналады. Алаштың өткенін көз алдыға әкелетін бұл ғимарат 1980 жылы «Казпроектреставрация» институтының қорғауына алынған еді. Содан бері талай мәрте жаңарып, жаңғырып келеді.
Аңызға бергісіз әңгімелерге қарағанда, вокзалдың іргесі алыстағы Ақирек тауынан әкеп қашалған тастардан қаланған. Әр тасы нөмірленіп, түйе керуенімен жеткізіліпті. Қабырғалары күйдірілген кірпіштен өріліп, төбесі мырышпен жабылған бұл ғимарат бір ғасырдан астам уақыт бойы Қазалының теміржол тарихымен бірге жасасып келеді.
2013 жылы вокзалға алғашқы күрделі жөндеу жұмыстары жүргізілген болса, биыл сәуір айынан бастап жаңа кезеңдегі жаңғырту басталды. Себеп – тоғыз жолдың торабындағы жолаушы ағымына жайлы жағдай жасау, тарих пен замана талабын ұштастыру.
Қазіргі таңда вокзалдың іргетасын бекіту, шатырын толықтай жаңарту, есік-терезелерін ауыстыру жұмыстары жүріп жатыр. Сонымен бірге заманауи стандарттарға сай келетін күту залдары, мүмкіндігі шектеулі жандарға арналған инфрақұрылым, қауіпсіздік жүйелері мен сыртқы абаттандыру жұмыстары да қатар қолға алынған. Вокзал алдындағы алаңға брусчатка төселіп, жасыл желекпен көмкеріледі.
Бұл ауқымды жұмыстарды «Қазақстан Темір Жолы» ұлттық компаниясының қолдауымен «Бақ Береке» серіктестігі жүзеге асыруда. Ал жолаушылардың қауіпсіз әрі ыңғайлы қозғалысы үшін теміржол үстінен өтетін жаңа жаяу жүргіншілер көпірі де бой көтеруде. Көпір құрылысын «ҚазТеміржол Engineering» ЖШС атқарып жатыр.
Жақында Қазалы ауданының әкімі Мейрамбек Зинабдинұлы вокзалға арнайы барып, атқарылып жатқан жұмыстармен танысты. Ол вокзалдың сырт келбетінің, тазалығы мен жолаушыларға көрсетілетін қызмет сапасының өңір беделіне тікелей әсер ететінін атап өтті. Сондай-ақ, мердігер мекемелерге жұмыс барысын жүйелі жүргізіп, жыл соңына дейін сапалы әрі мерзімінде аяқтауды қатаң тапсырды.
Тарихы терең, болашағы жарқын Қазалы вокзалы – теміржол торабы ғана емес, елдің өткені мен ертеңін жалғаған алтын арқау. Бүгінгі қайта жаңғыру – сол алтын арқауды жаңа ғасырмен жалғайтын жаңаша қадам.
